ولأول مره تحاول انها تتخلي عن فسادها الإعلامي .. المهم .. قعدت أفكر ياتري هما هيحكموا عليه بجد .. أرجع وأقول لا استحاله ده العادلي .. افكر تاني واقول ياتري هيعدموه ع اللي عملوا في البلد وقتل المتظاهرين وقضايا السرقه والنهب وغسيل الأموال .. الاقي عقلي بيقولي انت اهبل ولا ايه .. اكيد هياخد تأجيل وجلسه والتانيه والتالته وادينا ماشيين في المحاكم .. لغاية البراءة .. والله الموفق
المهم قلت اناهتعب نفسي ليه انا استني المحاكمه لما تتعرض علي التليفزيون ..
جبت العلبه الكيلوباترا والولاعه وقعدت في انتظار العرض .. بالفعل عرضوا القاعه والقفص والحضور والقضاء والدنيا حلوه .. قلت قشطه كده هيفشخوه ( ع العادلي ) ..
قعدت الناس وفي اللي واقف واللي قاعد علي رجل التاني لان القاعه كانت ضيقه للغايه .. وإذ فجأة ظهر الساده القضاه وقعدوا بورقهم ولمونهم وميتهم المعدنيه .. وانااقول يلابقي ياعم القضاء ريح الليلة وريح أهالي الشهدا وريحنا من الملعون ده خلينا نخلص ...
قلت بقي الجلسه اكيد هتطول وكده .. لقيت الحكم صدر بتأجيل الجلسه ليوم 3 أغسطس .. اهرش عينيا وأفتحها تاني .. طب أغير القناه .. ألاقي نفس الخبر .. (خخخخخخخخخخخخخ ) ولعت بعد هذه الأصوات التي أخرجتها من أعماق غيظي سيجاره وقعدت أسمع التحليلات ع الجلسه .. لقيت كل المحامين والمستشارين بيعترضوا ع الحكم .. وعلي إنه باطل وانه مينفعش ومخالف للقانون وهذا إن دل فإنما يدل علي تباطؤ القضاء وتوطؤه ايضاً .
المهم بعد سماع التحليلات .. وكادت السيجارة رقم 7 أن تلامس أصابعي ... سمحت لنفسي بالتحليل ..
فقلت إذا كان القضاء نزيه فلماذا يصدر حكم باطل .. هذا دليل علي فساد القضاء أيضا .
وقلت يعني هما مش قادرين يحاكموه ويريحوا الليله .. قلت طب هيروح من المجلس العسكري فين إذا كان هو المتحكم الأول والأخير في البلد حالياً .. هتقولي القضاء مستقل ونزيه هقولك أقرا السطر اللي قبل اللي فات .
قلت إذا كان الحكم السابق لمصر حكم أُسري وليس حكم رئاسي .. فأكيد العادلي كان احد أبناء هذه الأسره .. أو ع الأقل صديق الأسره .. وحامي الأسره .. فهل الشعب بيضحك عليه للدرجه دي وفاكر انه ممكن يلاقي العادلي بيتعدم أو ع الأقل بيتحكم عليه .. إستحاله .. ده مفيش ولاواحد اتحكم عليه حكم حقيقي أوعلني ..
أخيراً .. إذا كنا نسعي لتطبيق العدل في مصرنا الحبيبه .. فعلينا أن نعلم جيداً انه لن يطبق العدل علي العادلي أو أي واحد من الأسره الحاكمة المخلوعه ... وإمتثال العادلي أمام القضاء في قفص الإتهام ليس إلامجرد تهدأه للرأي العام وعبث بعقولنا جميعا ..
